धम्की र आतंकले स्थानिय गाँउलेहरू विस्थापित

सिन्धुपाल्चोक, १६ साउन ।
सशस्त्र समूह नेकपा चेवादीले गोल्चे र सेलाङ गाविसका सबै युवाहरूलाई जबरजस्ती आफ्नो संगठनमा बस्न दबाव दिँदै गाँउमा चन्दा आतंक सिर्जना गरेपछि सेलाङ गाविस-८ स्थित सेवगाउ र गोल्चे गाविस-४ र ५ का पुरुषहरू विस्थापित भएका छन् ।

कम्युनिष्ट नेता चेग्वाराको नामबाट आफुलाई नेकपा चेवादी नामाकरण गरी गत दुई महिनादेखि यस सिन्धुपाल्चोक जिल्लाको उत्तरी क्षेत्रमा यस समूहले सशस्त्र गतिविधि गर्दै आएको छ । जिल्लाको उत्तरी भेगमा पर्ने गोल्चे, पाङताङ, गुम्वा, बराम्ची, सेलाङ जस्ता गाविसहरूका युवाहरूलाई लडाकु बन्न दबाव आएपछि गाँउमा युवाहरू बस्न नसकेको गोल्चेका जालबहादुर लामाले बताए ।

यो समूह अर्थमन्त्री वर्षमान पुनको प्रमुख अतिथ्यमा जलविरे गाविसमा आयोजित माओवादीको आमसभामा बम विष्फोट गरी चर्चामा आएको हो । यस समूहको नेतृत्व गोल्चे गाविस-७ का सोनाम लामाले गरेका छन् । सोनाम लामा माओवादीको सशस्त्र युद्धका बेला माओवादी थिए । पछि उनी तामाङ मुक्ति मोर्चामा रहेको बताउथे । ०६९ जेठमा गोल्चेमा नेकपा चेवादीको नामबाट सशस्त्र सङ्घर्ष गर्ने भनी त्यस भेगका युवाहरू जम्मा गरी हतियार प्रदर्शन गरेका थिए ।

गोल्चे भेगमा हतियार सहितका युवाहरूले गाँउमा आतंकित बनाउँदै हिडेको खबर प्रहरीले पाएपछि प्रहरीले त्यस भेगमा छापा मारेको थियो । नेकपा चेवादीका चार कार्यकर्ताहरूलाई ०६९ असार १६ गते राती भरुवा बन्दुक चार थान, डेटोनेटर, फ्युज वायर, कम्ब्याट ड्रेस, पुस्तकहरू लगायतका युद्धका सामग्री सहित प्रहरीले गिरफ्तारसमेत गरेको थियो ।

चेवादी समूहले हाल आएर स्थानीय गाँउलेहरूसँग ५० हजारदेखि ३ लाखसम्म चन्दा माग गरेपछि गाँउलेहरू विस्थापित भएको उनीहरू बताउँछन् । गाँउ छाडेर हिडेका युवाहरू चेवादी समूहको डरका कारण कुरा खुलेर भन्न सक्दैनन् ।

चेवादीले कार्यकर्ताको लिस्टमा गाँउका सबै युवाहरूको नाम राखेको छ । त्यो लिस्ट प्रहरीले बरामद गरेपछि प्रहरीले गाँउका सबै युवाहरू चेवादीको समूहमा संलग्न भएको आशंका गरेको छ । एकातिर चेवादीका नेताले भूमिगत जान दबाव गरेको अवस्था छ भने अर्कोतिर प्रहरीले चेवादीको आशंका गरेपछि गाँउमा पुरुषहरू नबसेको गोल्चेका पुर्व जनप्रतिनिधिले नाम उल्लेख नगर्ने शर्तमा बताए ।

नेकपा चेवादीको धम्कीका कारण गोल्चे गाविस-५ निम्लुङका चिरकने लामा र सोही ठाँउका जरी स्याङबोले घरमा ताला लगाएर परिवार सहित काठमाण्डौ विस्थापित भएका छन् । त्यसैगरी अन्य घरहरूमा महिलाहरू र वृद्धहरूमात्र छन् । अहिले गाँउमा खेती लगाउने समय भएपनि खेतमा आली लगाउने पुरुष कोही नभएको स्थानियले बताए ।
नातीबावु धिताल
स्रोत: इन्सेक अनलाइन