जनयुद्ध थाल्ने भन्दै तीन कम्यूनिष्ट पार्टीबीच एकीकरण

२ साउन, काठमाडौं । नेकपा माओवादी क्रान्तिकारी, नेकपा राष्ट्रवादी र नेपाल जन श्रमिक पार्टीले एकीकरण गरी नेकपा माओवादी क्रान्तिकारी नामक नयाँ पार्टी गठन गरेका छन् ।

सामन्ति राज्यसत्ताको अन्त्य गरी सर्वहारा वर्गको अधिनायकत्व हुने जनवादी सरकार स्थापनाका लागि जनयुद्ध थाल्ने तयारी स्वरुप नयाँ पार्टी गठन गरेको उनीहरुले बताएका छन् । सोमबार राजधानीमा पत्रकार सम्मेलन गरेर उनीहरुले आगामी मंसीर १५देखि २१ गतेसम्म पार्टीको एकता महाधिवेश गर्ने बताएका छन् ।

पत्रकार सम्मेलनमा नवगठित नेकपा माओवादी क्रान्तिकारीका अध्यक्ष जनपथले राज्य सत्ता बन्दुकको नालबाट मात्र प्राप्त हुने भन्दै सामन्तहरुको राज्यसत्तालाई पूर्णरुपमा ध्वस्तपारी नयाँ जनवादी राज्यव्यवस्था स्थापना गर्न पार्टीको राजनीतिक लक्ष्य रहेको बताउनु भयो । उहाँले सर्वहारा तथा कम्युनिष्टको झण्डा ओढेर विश्वको कम्युनिष्ट आन्दोलनलाई संसदवादी राजनीतिक गराउने प्रचण्ड, बाबुराम, मोहन वैद्य र मातृकाहरु असफल भएको आरोप समेत लगाउनु भयो ।