‘संविधानसभा विघटनले तरलताको सङ्कट आउनसक्छ’

जितेन्द्र श्रेष्ठ

जेठ १६, काठमाडौं । संविधानसभा विघटनपछि बैङ्क तथा वित्तीय क्षेत्रमा तरलताको संकट उत्पन्न हुनसक्ने बैंकर्सहरुले बताएका छन् । किष्ट बैंकका प्रबन्ध निर्देशक कमलप्रसाद ज्ञवालीले भने, ‘ठूला लगानीकर्ताहरु विदेसिने सम्भावना बढ्दो छ । बचतकर्ताहरुले पनि यहाँ गरिएको बचत सुरक्षित नठान्न सक्छन् । त्यसो हुँदा बैङ्क तथा वित्तीय क्षेत्रमा यसले ठूलो नकारात्मक असर पार्नसक्छ ।’ संविधानसभाको विघटनपछि लगानी सुनिश्चितता नहुँदा दीर्घकालीन लगानी र ठूला व्यवसायतर्फ लगानीकर्ताहरुको आकर्षण घट्दै जाने प्रवन्ध निर्देशक ज्ञवालीको तर्क छ ।

नेपाल बंगलादेश बैङ्कका प्रमुख कार्यकारी अधिकृत ज्ञानेन्द्र ढुङ्गाना पनि संविधानसभाको विघटनले बैङ्क तथा वित्तीय क्षेत्रमा ठूलो अन्योल सृजना गरेको स्विकार्छन् । ‘अव तरलता समस्यामा पर्न सक्छ  र बचतकर्ताहरु पनि घट्न सक्छन्’,  ढुङ्गानाले भने । उनका अनुसार घरजग्गा कारोवारलगायत विभिन्न व्यवसायमा लगानी भएको कर्जा असुलीमा पनि त्यसले समस्या सृजना गर्नेछ । त्यसो हुँदा अब राजनीतिक दलहरुले सर्वसाधारण र लगानीकर्तालाई विश्वस्त पार्नुपर्ने अवस्था सृजना भएको उनको भनाइ छ ।

संविधान बन्न नसक्दा बैङ्क तथा वित्तीय क्षेत्रमा लगानीमैत्री वातावरण खल्बलिएको नेपाल बैङ्कर्स एशोसिएसनका उपाध्यक्ष तथा सिटिजन्स बैंङ्कका प्रमुख कार्यकारी अधिकृत राजनसिंह भण्डारीले बताए । उनले भने, ‘संविधान बनेको भए विश्वमा नेपालको छवि राम्रो बन्दथ्यो र स्वदेशी तथा विदेशी लगानी आउन सक्ने थियो ।’ आर्थिक विकासमा बामे सर्दै गरेको अवस्थामा यस किसिमको कार्य हुनुले देशको अर्थतन्त्र नै धराशयी हुनसक्ने भण्डारीको तर्क छ ।

विकास बैङ्क संघका अध्यक्ष मनोज गोयल पनि वर्तमान अनिश्चयले बैङ्क तथा वित्तीय क्षेत्रमा संकटकालिन अवस्था सृजना गराउनसक्ने बताउँछन् । ‘दिर्घकालीन लगानी गर्ने लगानीकर्ताहरुलाई संविधानसभाको विघटनले अल्मल्याएको छ,’ गोयलले भने ।

देश अनिर्णयको बन्दि बनेकाले त्यस्को सोझो असर बैङ्क तथा वित्तीय क्षेत्रमा पर्ने सीएमबी फाइनान्सका प्रमुख कार्यकारी अधिकृत तथा वित्तीय संस्था संघका अध्यक्ष राजेन्द्रमान शाक्य वताउँछन् । ‘गत आर्थिक वर्षमा जस्तै तरलता जटिलतातर्फ ढकेलिने अवस्था सुजना हुनसक्छ’ शाक्यले भने ।

तर, इन्फ्रास्टक्चर्स डेभलपमेण्ट बैङ्कका प्रमुख कार्यकारी अधिकृत डा। इन्द्र हुमागाई भने बैङ्क तथा वित्तीय क्षेत्र पर्ख र हेरको नीतिमा रहनुपर्ने वताउँछन् । संविधानसभा विघटन भए पनि सबै बैङकर्सहरु आशावादी भएर कारोबार गरेमा समस्या सृजना नहुने हुमागाईको भनाई छ । उनका अनुसार डलरको भाउ बढेको र नेपाली मुद्रा कमजोर भएकाले लगानी हत्तपत्त बाहिर जाने अवस्था छैन । ‘घरमा रकम राख्दा पनि असुरक्षित हुने हुनाले सर्वसाधारण बैङ्कमै बचत गर्न अग्रशर हुने हुनाले बचतकर्ताहरु बढ्छन् र तरलता पनि अभाव हँुदैन’, हुमागाईंको दाबी छ । नेपाल राष्ट्र बैङ्क वित्तीय कर्मचारी संघका अध्यक्ष पदमराज रेग्मी भने अबको समय बैङ्क तथा वित्तीय संस्थाहरुका लागि जोखिमयुक्त समय आएको वताउँछन् ।